أمس جمعة ونسيت أكتبلك شسويت بيومي
المهم أمس عرس أخوي (أني ما رحت أكيد) , ما جاي أتذكر الأحداث لذلك راح أتذكر بالعكس (يعني من أخير شي سويته لأول شي سويته)
ضليت كاعد أسمع أغاني لل2 بالليل وأستمتعت بأغنية تيسير العراقية -صدك ولد- وقبلها جنت أشوف البشير ولو أني أصلا جنت اباوع أدفنجر تايم بس النت مضرط وبطلت عنها, وقبلها جنت ماخذ نومة فاهية ام الدقيقتين
قبلها جنت هم أسمع اغاني مسرعة من شمراني أف أم بعد ما أكليت العشة اللي جابوه الي اللي هو كباب وببسي ونستله وباقر سولفلي شلون صار الحادث بالزفة وربك طب بالسرمثتون سو ...ما تعور هواي
طبعا هاي بعد ما انقذني باقر لان خوالي أجو وطبوا محد موجود بس آني (ربك أجن بس النسوان) وبقيت محصور بالبراني
بعد ما جنت أغني بعلو صوتي وآخذ جلق براحتي بالصالة وأخذيت صور وأنة لابس التيشيرت المكتوب عليه
Sleep With Me
مباشرة بعد ما طلعوا أهلي وقاسم أخذ صور بالغرفة وقبلها جنت اخمخم
بس ألى شي أخوي عود يزين جسمه بالمكينه لكيناه جنة وحده جايتها الدورة يخر دم أثاري شايل مال الاآمان مالتها ويزين بيها
المهم رتبناها آنة وحمودي وعدت سلامات
ها وقبلها جنة نتغده بالبراني لأن النسوان بالصالة
ف جنة أجت سوت لأبوي بعبوص
*خرب ...أحس حجيت شغلات مالها داعي
ها نسيت أسولفلك عن حلقات وقت المغامرة الللي شفتهن
أول حلقة تبدي بفين وجيك يدورون عن مغارة يردون يوصلولها بس بالطريق يلكون قطار وبي علامة أنفنتي فوك وما لاحظوها
المهم طبوا ولكوا بكل غرفة شخص أذا يكتلوه ياخذون اللوت مالته , جيك ضاج بعد ما طبوا لغرفتين وكتلوا اللي بيهن بس فين أدمن هالشي, جيك بهاللحظة شاف الصورة الأكبر خاصة بعد ما لكة بلورة يكدر يشوف بيها المستقبل وشِاف بيها فين وهو بالمستقبل عبارة عن عجوز جبير ولساته باقي بهذا القطار ويدور من غرفة لغرفة...حاول يوصل لفين اللي يشوفه بس فين ما فهم الا بعد مشاحنات وعرف أنو جان سجين لـ"قطار المتعة هذا" ومسيطر عليه
الحلقة الوراها بيها أسقاط على حالة الأوفرثنكينك عند الأنسان وشلون فين حسباله أن مجموعة من البزازين اللي لابسات كراتين مسويات مملكة وأن البزون اللي لكاه هو الأمير الحقيقي لكن أستولى على مكانه واحد لاخ وطرده...بس عرف بالأخير أنو ذني عبارة عن بزازين وبس
بعد مالي خلك أتذكر أي شي ...+ حاليا أكو حفلة بادية جواي (النسوان مشغلات ديجي ويركصن)
0 التعليقات:
إرسال تعليق